گوگل سے منسلک افراد کے مطابق اگرچہ ادارے نے کروم پر ایڈ بلاک کا فیچر متعارف کرانے کا ارادہ کیا ہے، مگر تاحال یہ واضح نہیں ہے کہ کمپنی کب تک یہ فیچر متعارف کروائی گی۔

خیال کیا جا رہا ہے کہ شاید گوگل آنے والے چند ہفتوں میں کروم پر ایڈ بلاک فیچر متعارف کرانے کا اعلان کرے، مگر یہ بھی ممکن ہے کہ گوگل اس فیچر کے بجائے کچھ اور فیچر متعارف کرائے۔

انٹرنیٹ پر براہ راست اشتہارات کو بلاک کرنے والی کچھ کمپنیز کو گوگل کی جانب سے رقم کی ادائیگی بھی کی جاتی ہے تاکہ وہ ایسے سافٹ ویئر تیار نہ کریں جس سے گوگل کے اشتہارات بلاک ہوسکیں، مگر پھر گوگل خود ہی کیوں ایسا فیچر متعارف کرانے کا سوچ رہا ہے؟

اس حوالے سے گوگل سے منسلک افراد کا کہنا ہے کہ ایڈ بلاک پر تیسری پارٹی کے کنٹرول سے بہتر ہے کہ گوگل اپنا ہی فیچر متعارف کرائے، اس سے صارفین کا کمپنی پر اعتماد بڑھے گا۔

ایک اندازے کے مطابق گوگل کروم پر اشتہارات کو بلاک کرنے والے سافٹ ویئرز اور آلات کی فروخت میں اضافہ ہوا، صرف امریکا میں ایڈ بلاک سافٹ ویئر کی کمائی میں 26 فیصد اضافہ دیکھا گیا۔

تاہم گوگل نے ایڈ بلاک فیچر متعارف کرانے کے حوالے سے گفتگو کرنے سے گریز کیا۔

اس لیے گوگل چاہتا ہے کہ وہ ایڈ بلاک فیچر بھی خود ہی متعارف کروائے، اس سے جہاں ایڈ بلاک کرنے پر اس کا کنٹرول ہوگا، وہیں ایڈبلاک سافٹ ویئر تیار کرنے والی کمپنیز کی بھی چھٹی ہوجائے گی۔

گوگل کروم اس وقت دنیا میں سب سے زیادہ استعمال ہونے والا براؤزر ہے اور اس پر ایڈ کو بلاک کرنے کے حوالے سے بھی کئی کمپنیوں کی جانب سے تیارکردہ سافٹ ویئرز کی کمائی میں اضافہ ہوا ہے۔

 

Share: